Congrès de l’Associacion Internacionala d’Estudis Occitans

Autor : Ramon Ginolhac

 

Lo XIIen congrès de l’A.I.E.O. se debanarà a Albi del dètz al quinze de julhet de 2017. Son esperats dos cents cercaires, universitaris, professors d’occitan venguent d’una dotzena de païses : Alemanha, Àustria, Belgica, Espanha, Estats Units d’America, Itàlia, Japon, Reialme Unit, Suissa...

Fa de decennias que los cercaires sus la matèria occitana avián presa l’abituda de se rescontrar a l’escasença de divèrses recampaments. En seguida, l’Associacion Internacionala d’Estudis Occitans foguèt creada en 1981 e dempuèi sos membres se tornan trobar cada tres ans, un còp dins una vila d’Occitània, un autre còp dins una vila universitària d’un país ont l’occitan es estudiat. Per exemple, los congrèsses se debanèron a Turin en 1987, a Montpelhièr en 1990, a Tolosa en 1996, a Vièna en 1999, a Bordèus en 2005, a Lhèida en 2014. Albi foguèt causida per 2017 ; i a un ensenhament de l’occitan, e tanben del catalan, a l’InstitutNacional Universitari Champollion e la vila interèssa encara mai dempuèi qu’es inscricha al patrimòni mondial de l’umanitat. Pr’aquò es l’Universitat Joan Jaurés de Tolosa l’organizatritz d’aquel congrès.
    Lo nom d’Albi es ligat a la Crosada contra los albigeses, guèrra de repression e de conquèsta de 1209 a 1229. Naturalament, lo tèma de congrès, « Fidelitats e dissidéncias » i fa referéncia. Per cinc jorns, son previstas quatre conferéncias, quatre taulas redondas e mai de cent trenta contribucions de mièja ora caduna. Domènis d’intervencions : literatura medievala, modèrna o contemporanèa, istòria medievala, modèrna o contemporanèa, lingüistica, sociolingüistica, sociologia, antropologia, musicologia. Nombre d’intervencions se faràn en lenga nòstra, d’autras en francés, en italian… Seriá fastidiós de balhar aicí lo program complèt ; se pòt trobar sus internèt amb un motor de recèrca, sufís de picar « AIEO 2017 ». Per aver una idèia, vaquí qualques titres de conferéncias e taulas redondas :
    - Y a-t-il une exception occitane dans la genèse des langues et des scripta romanes ?
    - Pour une réorientation interculturelle des études sur l’histoire de la littérature occitane
    - L’unitat de la lingïstica occitana
    - Peut-on parler d’une musique occitane ?
    - Les corpus informatisés pour les études occitanes
    …
    Òm vei plan que s’agís de recèrcas actualas d’un nivèl naut. Pr’aquò, las personas interessadas pòdon assistir al congrès en pagant un drech de dintrada de 35 € ; de longa, tres o quatre comunicacions se debanan en parallèle  e es totjorn possible d’i trobar de qué se provesir. Amai se lo contengut sembla qualque còp alunhat de las preocupacions dels occitans que parlan la lenga e que la vòlon promòure, aquel recampament de cercaires de divèrses païses es un signe de la dignitat de la lenga nòstra, de l’interès que de sabents li pòrtan a travèrs lo monde. Las tascas per la promocion de la lenga d’òc son multiplas e divèrsas : escòlas bilingüas e calandretas, corses d’adultes, luòcs d’escambis, centres de ressorgas, produccion de mejans pedagogics, preséncia sus internèt, literatura, cançons, pèças de teatre… e recèrca universitària. Aquel congrès es complementari de çò que associacions e autres operators fan dejà sus Albi e dins Tarn.
    Es un onor per Albi d’aculhir aquel congrès en 2017. Lo Centre Cultural Occitan d’Albigés e l’Institut d’Estudis Occitans de Tarn ne son partenaris amb l’Institut Nacional Universitari Champollion, la comuna d’Albi, lo departament de Tarn. Divèrsas visitas e animacions son previstas. Una escasença pro rara de parlar occitan dins las carrièiras d’Albi amb un Austrian o una Japonesa !

Écrire commentaire

Commentaires : 0