TOTAL FESTUM en quate temps hòrts

Autora : Carolina Dufau

 

Aquera dotzau edicion deu Total Festum que perpausa 95 eveniments hestius, de la fin de mai entiò lo començar de julhet, esparricats peu territòri de la Region Occitania. Aquiu ua seleccion de tròç causits au demiei d'aqueth abonde, qui pòrta entà la lutz las culturas occitanas e catalanas, en valorizant la lenga, la creacion e lo territòri.


La trainèra deu Cirdòc suu canau de Riquet / a comptar deu 5 de junh


Lo Cirdòc - Centre interregionau de desvolopament de l'occitan, basat a Besièrs - qu'ei lo gran associat deu Total Festum.

 

Aqueth actor màger deu paisatge culturau occitan qu'òbra dab las collectivitats e las associacions locaus. Que vòu acompanhar projèctes estructurants, entà güeitar, conservar, har conéisher e valorizar lo patrimòni culturau occitan.

 

L'equipa besierenca deu Cirdòc que s'i hè entà sostiéner la produccion e la difusion larga deus sabers actuaus, e entà desvolopar la transmission e l'apropriacion peus publics d'aqueths elements patrimoniaus estacats au territòri.

 

Que's tien prèsta entà estar sollicitada peus portaires de projèctes Total Festum, e entà botar a disposicion la trainèra «Le Tourmente» amainatjada en lòc de ressorça (mustras, documentacion, filmes, fòtos...) tot pròche deus eveniments, au briu deu canau de Riquet.

 

Atau lo ligam dab la cultura e la lenga qu'ei ahortit. Lo trajècte e estancs de la trainèra, dessenhats mercés aus Larèrs Ruraus, que son a seguir suu site web deu Cirdòc. Aqueth vaishèth que serà inaugurat lo 5 de junh. Un còp la sason acabada, que tornarà partir entà har navigar lo hestau Convivéncia.


Tarba en Canta / deu 7 au 11 de junh


Lo hestau de cants polifonics que's debana a Tarba, Ibòs e Semiac. Lançat en 2010, l'eveniment que programa concèrts de polifonia de grops locaus e de tota l'Euròpa, en mantruns endrets de las tres comunas.

 

Portaira de cultura e de ligam sociau, la polifonia qu'ei ua creacion collectiva tostemps renavida. Aquera iniciativa que plaça la canta de pertot : suus emponts, solide, mes tanben hens los bars dab moments de cantèra, au conservatòri de musica on intervienen los artistas programats, en concèrts entaus collegians, o enqüèra en bal a la votz entà har dançar los mainatges de las escòlas, puish en passa-carrèras e animacions cantadas au mercat.

 

En quauquas chifras, l'eveniment que pertòca a 10 000 hestenalèrs, 2000 escolans presents suus projèctes pedagogics, un centenat d'estagiaris per las master-classes, 250 artistas envitats e au totau un vintenat de concèrts e cantèras gratuits. Aqueth eveniment portat per las tres comunas organizatoras e l'ofici de torisme tarbés, qu'ei gavidat peu Pascal Caumont a la direccion artistica, professor de musica tradicionau au conservatòri Henri Duparc de Tarba, cantaire e director musicau de Vox Bigerri.


La Ronda deus Tòtems, Besièrs e Pesenàs / los 30 de junh, 1èr e 2 de julhet



 Los 1èr e 2 de julhet, lo Polin de Pesenàs, un deus mei ancians animaus dits «totemics», inscriut au repertòri immateriau de l'Unesco dempuish 2005, que serà l'òste de «La Ronda deus Tòtems». Los Amics deu Polin e la Vila de Pesenàs, dab lo CIRDÒC e lo CFPCI (Centre Francés deu Patrimòni Culturau e Immateriau) qu'organizan aquera grana permèra ronda europèa deus gigants e tòtems de França, Belgica e Catalonha.

 

Que's preparan a arcuélher 45 animaus totemics, gigants e dragons, en tot mesclar moments de hèsta, d'escambis, de partatges e de reflexions. Aqueste cap de setmana que mercarà l'istòria au son biaish, dab l'Amassada Generau constitutiva de la Federacion TOTEMIC deus tòtems occitans e catalans.

 

En realitat, l'eveniment que començarà lo 30 de junh, en fin de vrespada a Besièrs : lo CIRDÒC que'ns convida au lançament deu site internet TOTEMIC, qui aplegarà tot çò de bon saber sus aqueths gigants e bèstias : qui son las associacions qui'us pòrtan, quin las contactar, quan e on las bèstias e sorteishen segon l'agenda de las hèstas. Lo portau web qu'aubergarà ua totemotèca, bibliotèca numerica de ressorças de referéncia suus tòtems, on cada bèstia totemica e sera repertoriada, dab tots los documents que s'i rapòrtan : legendas de las originas, elements istorics e actuaus de la practica, fòtos, filmes, musica e rituaus estacats...

 

Lo reclam d'aqueth navèth mèdia que's harà peu site Occitanica, portau collectiu de la lenga e de la cultura occitanas, e tanben au dehens deu repertòri deu patrimòni culturau occitan, e deus portaus regionaus de la cultura e deu patrimòni.


Clavada deu Total Festum / 8 e 9 de julhet a Castèlnòu d'Arri


Augan, la clavada de la sason Total Festum que serà mercada peu detzau Hestau d'Espòrts Tradicionaus deu territòri occitan e catalan : corsas de vacas, camarguesas e landesas, palet gascon, quilhas, remas tradicionaus, tambornet, luta. Ua programacion culturau que pontuarà las jornadas de torneis e demostracions. Que va caler aténer ua annada de mei, entà arretrobar lo Forum Euròregionau, qui's tienerà a annada passada.

Écrire commentaire

Commentaires : 0