ORS, lo rei sortit de l'ivèrn

 

Autora : Carolina Dufau

 

Artús, lo grop de ròck tribau gascon, que presenta Ors lo son sheisau òpus. En cinc tròç, cinc dimensions de l'èste mitic que s'i passejan, hasent lo portrèit d'ua bèstia de caras multiplas, deu deishudar entiò l'auròst. Ua segotida musicau, gessida d'un projècte artistic audaciós, au son tostemps autant susprenent com pertocant.

 

Lo projècte Artús, precursor d'ua estetica radicau en las musicas tradicionaus, qu'inspirà e inspira enqüèra a mantuas generacions de joens occitans. Ors que sap au disc-aventura. Los sèt musicians d'Artús que's hèn observators e explorators a l'encòp. Que's botan en la pèth de l'ors shens l'aver tuat, en tot téisher ligams enter lo territòri e l'immateriau, la literatura e l'oralitat. L'aventura pirenenca b'ei transversau, gessida d'escambis dab lo Jean Soust, contaire, acompanhator en montanha, ingenior agronòma... shens desbrembar l'apòrt de l'obratge de referéncia l'Ours, Histoire d'un roi déchu, deu Michel Pastoureau.

En tot desenclavar las esteticas musicaus, que desembarran l'Ors, animau mitic au còp predator, protector e creatura presa en caça. Tot permèr, lo « Desvelh » que ns'auhereish un paisatge sonòr ad'aron d'ua bèstia qui's deishuda, crida peu permèr còp de l'an, e torna har virar ua Tèrra adromida. Puish la « Chasse party », pèça inspirada d'ua hèita qui aparishó au Jean Soust, a saber lo « jòc de pista enter un pòrc-sanglar, preda d'un ors, eth-medish tracat per l'òmi ». Qu'arretrobam sonoritats e cadéncias lanusquestas, cants a duas votz, puish ambients e chebits d'ua natura sauvatge. Dab gràcia e sensibilitat, « la Hòla » qu'esplandeish un lirisme atmosferic, enairejant, mercés au duò de còrdas sonsaina e vriulon. « L'Auròst » qu'esgrana los mots, e hè retronir un omenatge a Canèla, la darrèra orsa pirenenca. Lo sol tròç d'aqueste disc emprontat au repertòri tradicionau qu'ei « L'ors Dominique », dab extrèits causits peu tèxte de l'aussalés F. De Laborde.

 

 

 

Los d'Artús qu'apitèn Pagans ( pagansmusica.net), lo label « desparetant, despaisant, transgressiu ». Aqueth album, tau com la majoritat de las produccions Pagans, que sòrt devath la licéncia creative commons, alternativa au « tots drets reservats » tà liberar la proprietat intellectuau e pensar autament la difusion de las òbras sonòras. Libra e a contra-corrent, la musica artusana qu'ei carnada, bronzinanta, abrasiva e poderosa. Que'ns segoteish los soviers arcaïcs. Que'ns liura un ròck amplificat regde actuau, neurit de sons organics gessits de la tradicion gascona, tan peus instruments com per las votz qui hèn soar la lenga nosta a de bonas.

 

 

 

Suu visuau roi e negre de l'album, las corbas d'ua perissa doça e d'un mus atendrissent que's destacan en gulas carnassèras de mordics negras. Atau qu'èm, òmis e hemblas, complexes e multiplas. Atau qu'ei, l'ors d'Artús, lo noste doble sauvatge, nòble, ric e pregond.

ARTÚS
Roman Baudoin : sonsaina solid body Artus

 

Matèu Baudoin : cant, vriulon

 

Tomàs Baudoin : cant, tamborin, Dark Energy

 

Pairbon (Roman Colautti) : baisha

 

Shape2 (Nicolas Godin) : percussions, guitarra

 

Alexis Toussaint : bateria

 

Écrire commentaire

Commentaires : 0