Papà Gahùs : enfin !

    Enfin ! 3 ans après « Lo Virolet », eth grop de rock-punk occitan Papà Gahús que sorteish eth sué dusau album entitolat « Calhavari ! ». Un còp aver drin virat de pertot, de Tarba entiò Siròs e de Rodés entiò Agedeth, que decidèn d'entrar en estudiò entà i enregistrar-i un navèth disc. Entà ne saber mes, qu'avem eth plaser d'encontrar a Renaud Lassala eth navèth guitarrista dau grop gascon.

Adiu Renaud, e'ns pòdes díder quauques mots sus tu e presentar eth grop Papà Gahús ?
Adiu. Que'm hèci Renaud, sui lo guitariste de Papà Gahús despuish 2014. Qu'èm un grop de rock, influençat preu punk « primari » de les annadas 1977 dinc a 1990.  Qu'èm quate (bateria, baisha, guitarra e cant). Que càntam en gascon e un chicòt en francés.

Papà Gahús qu’ei a l’encòp : un grop radicau, rebelle e punk ; e tanben un grop estacat au territòri. D’aon e’vs vié aqueth ligam hòrt dab la tèrra? e quin s’exprimeish ena vòsta musica ?
Qu’èm tot quate hòrt estacats au nòste territòri nadau, Gino, Mickey e Silvan a la Bigòrra, jo a les Lanas. Qu’i am creishut e que ns’am hargat ua cultura dessús. Donc, adara, atau com hòrt de gènts de le nòsta generacion, qu’èm un mescladís de cultura mondialisada (grana influença anglo-saxòna en le musica) e d’identitat locau. Donc, ne hèm ni aus Americans ni aus Gascons « mè gascon que mòrs », que vívem le nòsta cultura d’un biaish descomplexat.
Lo ligam hòrt a le tèrra que s’i torna trobar en los samples tots extrèits de collectatges nòstes (sonque quauques excepcions) dab locutors natius deu gascon. Que balha com ua autenticitat au nòste perpaus.

Quin definirés la musica de Papà Gahús sus aqueth darrèr album ? E i a ua evolucion despuish eth permèr album ?
Que dirí qu’es ròck dab influenças punk. Après, jo, suu permèr album, n’i èri pas mes que’m sembla qu’i a ua evolucion. Que’m sembla estar mè rock, belèu mè escur tanben, shens de desbrombar lo costat amusiu. Los tèxtes que son tanben mè pregonds, qu’exprimen ua realitat, un constat sus un mond dont es a cambiar. Mes qu’am volut har un disc vivant shens de nes interdíser cantas mè leugèiras, un disc vivant percè digun n’es pas enmalit 365 jorns sus 365, n’es pas desconaire 365 jorns sus 365, n’es pas pessimiste tostemps o veit tot en ròsa a tot vira codic.
L’evolucion tanben que serà en los samples e en le soa utilisacion, lo disc qu’es com ua sola grana canta dont s’estanca pas jamè e los samples que hèn lo ligam dab tot. Que’us am utilisats mè pregonament, dab mè de puishença artistica. Ne son pas aquí entà ondrar, qué. Que n’i a, samples, se’us vòletz entèner, que ves vatz caler escotar lo disc en sancèr !

Laguens l'album que vié, que i aurà ua cançon tota en francés. Lhèu la cançon mes punk. E i a ua explicacion ad aquera causida ?
Vertat, e'm pensi tanben qu'es le mè punk. Ne sèi pas tròp perqué se hadot atau, en francés. Aquò, lo Silvan b'at diu saber mè plan que jo. Mes qu'èra belèu entà escopir a le faça deu monde : « Giscard ves chapa mè de 2 millions d'euros per an » en le lenga de le Republica ! 

Laguens daus albums de Papà Gahús, que s'enten ua atencion tota particulara a la lenga, la sua autenticitat, la sua qualitat. D'aon e vié aquera volentat ?
Quèn atz sèga-traucat lo peís com am hèit Silvan e jo en hadents collèctas, quèn atz enregistrat centenats de gènts en le soa lenga mairau, aunestament, ne pòdetz pas préner le question de le lenga com qui se'n fot. Aqueth monde que vs'an dat ua paraula rica, que'vs cau tornar har soar aquesta lenga dab arrespèct e dignitat. Au mensh, qu'ensàjam d'at har atau.
E veges un ligam entre la vòsta musica harta de radicalitat e la causida de la lenga ?
Bon, dejà, de har ròck en òc qu'es ua causida radicau percè qu'arríbatz en'queth paradòxe, que càntatz en le lenga deu peís mes le maja partida deu monde ne'v comprenen pas mè. Donc, díser « se'n fótem, que contúnham, qu'èm d'ací e qu'at vòlem har atau e sonqu'atau », n'es pas quauquarren de comun. Qu'èm gènts, ça'm par, autentics que ne chicanan pas, alavetz que liùram lo dequò d'un sol tròç. Qu'èm atau.
Com l'ensemble daus grops punks, la vòsta musica que pòrta ua energia plan vegedera en concèrt. Ei ua dificultat entà vosauts a l'ora d'enregistrar ?
Disem qu'am jogat un chic mens viste e que s'èm aplicats ! Après, non, lo qui pòt jogar a huec que pòt jogar a plaser. Lo contrari n'es pas forçadament vrai !

E i a un recepcion particulara dau public de musica rock-punk quan e's vei arribar en concèrt un grop qui canta en occitan ?  
Qu'i a duas recepcions. Gènts dont son hòrt contènts d'entèner a cantar en occitan e d'auts que nes vinen véder entà díser « la musique est super mais on comprend pas les paroles ». Alavetz, jo que'us demandi perqué ne van pas díser aus grops francés que cantan en anglés « On comprend pas les paroles ! ». Le pròva, qu'exista totun encoèra ua cèrta diglossia dab les lengas ditas minoritàrias... Mes aquò rai. Les reaccions que son tostemps positivas.
 E mè que mè, lo public qu'es contènt de véder un grop que's devertís, que descona, que comunica dab le gènt, que sauta, que crida, que trauca l'empont, que hèn càder los micròs, que's pèrden les baguetas, lo mediatòr, les paraulas, les nòtas e que se'n arrid ! Que pòden díser que Papà Gahús en live qu'es un estorbilh mes un estorbilh que ne jòga pas tròp mau ! Qu'èm un grop de ròck permèr, qué.
S.P.

L’album « Calhari! » qu’ei en venta sus eth site internet de Papà Gahús : papagahus.com


Écrire commentaire

Commentaires : 0