Tè Vé Òc vèrs lei dralhas de 2017

Un estiu ric d’accions occitanas un pauc d’en pertot !
Après de vacanças fruchosas, qu’en estiu lei festenaus son nombrós e lei fèstas occitanas fan flòri, nos resta de faire ausir la lenga culhida dins mantuns domènis !

Lei captacions de Tè Vé Òc au Forum de Castèlnòu d’Arri, se pòdon veire sus Occitanica : JF Tisner e sa presentacion de « Tralhaires »; o l’espectacle remirable « Supereròi » qu’ es una  adaptacion de la pèça Superhéroe, de la Cia espanhòla El Perro Azul, amb la votz interiora de l'enfant jogada en occitan, mercé au trabalh  de Pixel Oc. E encara, lei taulas redondas ricas sus lo teatre occitan, la musica occitana, la cosina, leis animaus totemics (Conferéncia de C Alranc), lei conferéncias e lei refleccions animadas per leis institucionaus. Brèu, tot çò que fau saupre sus l’anament de la vida occitana d’uèi.
A l’Estivada de Rodès, nòstra salariada Amada Cròs, realzèt un reportatge d etria sus lo concèrt dei Diables de la garriga. Una musica que desrevlha ! E en mai d’aquò una mesa en scèna originala. De retrobar sus nòstre site !

 

Setembre. Represa deis emissions
De segur que lei primièiras emissions de setembre vos faràn profiechar d’espectacles e de concèrts variats, pescats dins l’arial grand occitan. Me dirètz, quala Occitania ? Ara que lo nom de la granda region novèla fai polemica ! Fau dire qu’amb lei mejans modestes de nòstra associacion, avem pas léser de faire totei lei desplaçaments que voldriám faire ! Ensajam siá de gropar nòstrei rodatges, siá d’anar pas tròp luènh. Mas, es l’eime occitan que nos en fasem lo resson.
Es ansin qu’entendrètz tanben un concèrt filmat a “Convivència” en Arles : “Fièra” de Guylaine Renaud e son grop, mai tanben de moments de refleccion coma a l’UOE de Nimes amb la Josiana Ubaud. Trobarètz tanben sus nòstre site, un resson de la Fèsta dei Cafès Òc a Somèire, bòrd qu’aquelei cafès son ara nombròs dins Gard, Eraut, Aude e d’autrei despartaments. Fau dire que son un mejan bèu de faire marchar la lenga e de sensibilizar lei gens a l’occitan en mesclant fèsta, convivialitat e refleccion. Son ben installats ara dins lo Miègjorn, e en Auvernha existisson sota una autra forma.
Tè Vé Òc, es a l’Estanquet actiu de Narbona que se presentèt au public amb projeccion de corts metratges e discutida sus son trabalh. (veire site http://teveoc.e-monsite.com/)

 

Projèctes 2016/2017
Tè Vé Òc vai contunhar de crear de corts metratges de ficcion en collègi, un biais actuau e modern d’integrar la lenga e la cultura d’Òc amb de mejans moderns adaptats ai joves e amb l’ajuda financièra de l’associacion Zo Petaçon. L’associacion farà tanben de formacions per lo CFPO Lengadòc.
Tè Vé Òc es la partenaria importanta de Raions d’Òc, qu’organiza a Sant Gervasi (30) lo Festenau Rescòntre dau cort metratge, la primièra dimenchada de febrièr de 2017. Es temps per vos de mandar vòstrei realizacions (participacion a gratis.) Vidèo de 15 mn maxi, en Occitan o non, mai filmada en Occitania. Pòdon èstre ficcion, documentari, reportatge, clip. Mandar a michelgravier30[at]orange.fr avant lo 20 de genièr.

 

Coma lo vesetz, Tè Vé Òc es en camin per la sauvagarda de nòstra bèla lenga e de nòׇstra  cultura.

 

Lisa Gròs. Presidenta de Tè Vé Òc

Écrire commentaire

Commentaires : 0