Jan Lafon, l’abat collector

A la prima de 2015 sortirà una causida de contes collectats e adobats per l’abat Jan Lafon de Ròcamador.

Nascut en 1922 a Ròcamador dins una familha de païsans, presarà tota sa vida sa lenga occitana. Aurà tengut d’atraçar contes e cançons, legendas e cresenças, çò prumièr per escrich, après amb un magnetofòn. Es tant òme de glèisa coma occitanista e aital sèg la rega entemenada pels nombroses curats carcinòls que s’afusquèron per publicar lor lenga dins las pus polidas òbras : Gustin Gari, Juli Cubainas, Antonin Eretièr, Amadiu Lemòzi, Silvan Tolza...etc.
Es l’etnològa Martina Bèrgas del Conselh General d’Òlt qu’a prepausat a l’abat que tot lo seune fons siès pausat als archius departamentals e que se’n publiquès una part, aquela dedicada als contes e racontes. L’abat z’a ben volgut e l’IEO d’Òlt a collaborat amb el amai Martina Bèrgas per l’edicion d’aqueles tèxtes. L’associacion La Granja a collaborat de son pam a l’edicion d’unas bendas enregistradas per l’abat. Lo trabalh acabat presentarà un libre en edicion bilingua occitan-francés de 226 pajas acompanhat d’un disc que recampa onze contes e racontes enregistrats per l’abat. Se poirà crompar al prètz de 19,90 €. La publicacion d’aquel libre-disc es una pèira de mai ajustada a l’entrepresa de publicacion menada per l’IEO d’Òlt qu’es content de tant e mai que los finançaires d’aquel libre son mai que d’occitanistas : l’i comptam en mai de l’IEO d’Òlt lo Conselh General d’Òlt, la Comuna de Ròcamador e l’associacion dels Amics de Ròcamador.


G.B.

Écrire commentaire

Commentaires : 0