De cantas e de tèrra




Ouverture de la souscription pour le DVD de Sylvain Carrère De cantas e de tèrra.

L'occasion de revenir sur l'interview accordée à Lo Diari au numéro 23.

Dins aquestas colomnas, vos parlèm fòrça de cultura occitana, d’actualitat culturala ; de las creacions, de las activitats... Aicí, vos volèm parlar de los (e las, de segur) que fan aquesta activitat culturala. De personalitats de l’ombra, o mas en vistas, anèm encontrar de personas divèrsas, coma la cultura la meteissa.
Uèi, començam ambe Sylvain Carrère, qu’es... qu’es un... Qu’es pro complèx e pas aisit de definir !
Rencontre.

Lo Diari : Fondator d’un collectiu artistic (Arsèc), del festenal Lo Gran Borrat de Tarbas, cantaire del grop Papà Gahùs, comedian de doblatge occitan, enquestaire etnografic, òme de television e de ràdio, realizator… Deu pas èstre aisit de far de cartas de visita ! Per ont ven un c.v. tan divèrs : èra una volontat o se foguèsse mai « per accident » ?
Sylvain Carrère : Tiò qu’ei ua volentat de’s hicar au servici de la cultura, de’n estar un servidor, que sia d’ua faiçon professionau, mes tanben d’ua faiçon benevòla dab Arsèc, e lo Gran Borrat notadament. Qu’ensagi de miar lo men percors com un petit païsan, en estar en capablor de poder tocar a tot. Qu’ei ua faiçon de’s ganhar la soa libertat tanben.

LD : Aquò dit, fas d’occitan e d’audiovisual desempuèi de longtemps, de l’escòla. Sabiás ja çò que voliás far ?
S.C. : Segur que non ! que volèvi estar jogaire de rugbí a Lorda, jo ! Arren n’èra previst deguens lo men cap, que son los encontres de qui’t mian a las experiénças.

LD : Trabalhas sus e en occitan, principalament dins l’audiovisual. Per tu, es important de portar la lenga e la cultura dins aqueste domeni ?
S.C. : Ne cau pas pensar las causas atau. Que cau portar ideas e energias: la creativitat que deu estar la rason prumèra d’aquera enveja de hèr imatges. La lenga qu’arriba en seguir de faiçon naturau. Que’m fatiga de véger quauques occitanistes a estampilhar tot : musica occitana, cine occitan...on vam atau ? La creacion artistica n’a pas besonh de bandièras : qu’ei un acte universau !

LD : Uèi realizas Azun, de cantas e de tèrra, un documentari de 52 minutas sus la vivacitat de la pratica del cant polifonic dins la val d’Asun. Qu’es l’origina d’aqueste projècte ?
S.C. : La collecta qu’ei la basa d’aqueste projècte. Que collectèi en Asun en 2012, e qu’èra estat ua evidénçia de hèr un filme a l’entorn d’aquera practica de qui tòca totas las generacions.

LD : Quin es la tòca del film ? Daissar, dins la memòria, una traça d’un temps passat ?
S.C. : Qu’ei lo present de qui m’intèressa : lo passat n’ei pas qu’ua clau entà compréner las causas. Aqueth filme qu’ei ua fotografia d’ua practica en 2014 hens ua vath de las Pireneas. Elements deu passat que i son evocats, mes que son aquiu entà compréner lo present, e tà neurir l’avénguer.

LD : Cossí los protagonistas reagiguèron al projècte ?
S.C. : Que son fièrs, e que’s hican a dispausicion dab gòi e plaser. Lo hèit de hèr causas en lenga gascona que permet de hicar en plaça ua relacion de hidença dab las populacions.

LD : A qui s’adreça lo filme ?
S.C. : Lo filme que s’adreça au monde de qui aiman la montanha, la canta, e de qui pensan qu’un aute monde ei possible. Que parli drin com un “hippie” aquiu, mes qu’avem tot en man entà bastir doman ua societat navèra, on cadun auré lo son ròtle. Cadun que pòt miar quauqu’arren de positeu a la societat : que sufeish de’s balhar los mejans d’at hèr. La canta qu’ei la metafòra d’aquera societat saunejada segon jo : cadun qu’a un ròtle a jogar.


Télécharger
Bulletin de souscription
Soutenez la sortie du DVD de Sylvain Carrère en passant commande dès à présent avec le bulletin ci-contre.
DVD souscription Azun.pdf
Document Adobe Acrobat 181.0 KB

Écrire commentaire

Commentaires : 0