Memòrias d’Arièja

Memòrias d’Arièja, Salvagarda e trasmission de la tradicion orala occitana dins lo departament d’Arièja.

Le projècte de l’Universitat de Tolosa II - Joan Jaurès e del Conselh General d’Arièja, a per ambicion de preservar la tradicion orala de nòstre territòri e de servir d’utís de trasmission e de partatge entre las diferentas generacions.

Son en tot mai de quatre-vint ariegeses que se son fisats davant la camerà, dins lor lenga de còr, sus la tèrra de lors aujòls o de lor joïnessa. Nos parlan mai que mai de las tradicions ligadas a las fèstas calendàrias, del biais que s’organizava la vida dins las bòrdas e los vilatges e nos fan partejar formulas, cants e contes eretats de la tradicion orala.
Brèu, un trabalh vertadièr de memòria e de còr…


Començat en 2010, per una fasa de sensibilizacion puèi de collectatge alprès dels estatjants dels 4 païses d’Arièja (país dels Pirenèus Catars, País de Coserans, País de las Pòrtas d’Arièja e País de Foish Arièja-Nauta) e de totis los actors locals concernits, lo projècte recebèt lo sosten de la Region Miègjorn-Pirenèus, del Rectorat de l’Acadèmia de Tolosa e de la Direccion academica dels servicis de l’Educacion Nacionala d’Arièja.


Un trabalh de fons que se concretiza uèi amb la publicacion d’un DVD acompanhat d’un libret didactic.
L’institut d’Estudis Occitans d’Arièja foguèt encargat, per l’Universitat de Tolosa Joan Jaurès e lo Conselh General d’Arièja, de realizar un quarantenat d’animacions publicas e escolaras per far conéisser aquel utís cultural e de proposar una restitucion d’aquel trabalh apassionant sus la cultura e la lenga del país.

Écrire commentaire

Commentaires : 0