L'Ais Foissenc : Migracions de trabalh cap a Catalonha a l'epòca modèrna.

Lo naut País de Foish, o Savartés, en amont de Foish, es a l’epòca modèrna (s. XVI-XVIII), una tèrra de passatge d’òmes e de productes cap a Catalonha e a Andòrra. L’estudi d’aquela region permet de s’interrogar sus la plaça dels mercadièrs dins los Pirenèus e especificament dins una region de « frontièra ».

En mai, al delà de l’activitat dels mercadièrs locals es l’importància d’actors, plan actius, venguts d’endacòm mai, e finalament l’importància de la val d’Arièja coma lòc de passatge e de rescontres entre occitans, venguts de Bearn, d’Auvèrnha, de Lemosin, dels Alps, e catalans e andorrans, que se desvelan.

La preséncia de mercadièrs e de pairolièrs auvernhats en País de Foish es clarament atestada. Se coneis pro la tradicion migratòria d’aquesta region cap a d’autras regions del reialme o d’Euròpa, en particular cap a la Peninsula iberica. Aquelas migracions mercadièras avián pas res d’anecdotic : avèm amb aqueles mercadièrs, d’actors essencials del comèrci transpirenc qu’establiguèron de colonias dins las vilas frontalièras e interioras de Catalonha e d’Andòrra. En mai de tenir botigas dins aquelas vilas, lor ròtle d’intermediaris comercials èra important: introdusissián de lana o d’òli d’oliva dins lo reialme de França, de muòls e de teissuts, dins la Peninsula iberica.

Las migracions mercadièras venent del Massís septentrional èran pas las solas. Tanben, i aviá los bearneses que fasián d’anars e tornars lo long dels Pirenèus cargats de capas e tornant amb de productes iberics. Lo naut País de Foish – coma d’autras zònas – recebiá unes dalfineses, venent mai que mai de la part alpenca de Dalfinat, dels escartons del Briançonés, de la diocèsi d’Embrun, de la Val Varaita (diocèsi de Turin).

Aquelas peçòtas d’un tablèu mai bèl mòstran gents de Nauta Auvèrnha e de Bas Lemosin que se dirigisson cap a la Peninsula iberica, s’i installan e i jògan un ròtle important dins lo comèrci. Fan veire lo camin del comèrci dels muòls d’Auvèrnha e la rota de las capas de pastor de Bearn fins a Catalonha e Aragon. Dins l’autre sens, sal, lana, òli dintravan cap a Gasconha e Lengadòc. País de montanha, lo Savartés es pas brica demorat al marge de la circulacion dels òmes e de las merças a l’epòca modèrna e, d’aquel punt de vista participava plenament a l’economia globala e lo sieu estudi es una pèça de mai menada al dorsièr de l’intensitat de las relacions occitano-catalanas, al de la porositat dels Pirenèus, quitament a l’existéncia, fins a una epòca pro tardiva, d’una comunitat umana espandida de cada costat de la montanha, malgrat la frontièra politica.

 

Patrici POJADA

Du même auteur, sur les même thèmes

  • P. POUJADE, Une société marchande. Le commerce et ses acteurs dans les Pyrénées modernes (haut Pays de Foix, vers 1550-1700), Toulouse, Presses Universitaires du Mirail, 2008, 474 p.
  • P. POUJADE, Le Voisin et le Migrant. Hommes et circulations dans les Pyrénées modernes (XVIe-XIXe siècle), Rennes, Presses Universitaires de Rennes, 2011, 369 p.
  • P. POJADA, "Les xarxes comercials transpirinenques al segle XVII", Les xarxes urbanes a la Catalunya dels segles XVI i XVII, Barcelone, Rafael Dalmau, 2012, pp. 55-77.
  • P. POJADA, « Comerciar a través dels Pirineus a l’època moderna. Una xarxa comercial entre Llenguadoc i Catalunya al segle XVII », Recerques, 2012, pp. 29-48.

Écrire commentaire

Commentaires : 0