Universitat d'estiu de La Guepia

Eveniment central de l’activitat culturala de l’estiu, l’Universitat Occitana d’Estiu de La Guepia es un moment de rencontre, de convivéncia, mai taben de reflexion sus la langua e la cultura occitana, dins l’ensemble. Vertadièra veirina tant que labòratori, retrait d’un eveniment qu’anima La Guepia desempuèi 2001.


Lo mot de l’organizator

Rencontre amb Renaud Savy, coordinator de Lenga Viva, l’associacion qu’organiza L'universitat occitana d'estiu de La Guepia

 

LD : La manifestacion es instalada a La Guepia desempuèi 2001 e existiguèt ja davant. Cossí explicar una tala longevitat ?

R.S. : Aquela annada serà la tretzena edicion de l'Universitat d'Estiu. Cal rendre un omenatge a Alain Raynal que portèt aquel projècte tre la debuta duscas a l'an passat. Sens él pareguèt fòrça malaisit de continuar, mas podèm comptar sus los abituats, que venon casiment cada annada e sul sosten del vilatge, a travès de la municipalitat e las associacions coma Citrus, le comitat de las fèstas, los pompièrs...

 

LD :Quinas novetats aquesta anada ?

R.S. : Una bona partida dels membres de l'associacion son novèls e avèm l'ajuda de las associacions Escambiar e del Caireforc Cultural Arnaud Bernat de Tolosa. En mai d'aquò avèm volgut prepausar mai d'ofèrta culturala amb de concèrts, de filmes, de discutidas e de talhièrs suplementaris. Avèm per tòca de far venir una nòva generacion d'estagiaris que nos donaran encara mai d'idèias pel futur.

 

LD : De musica, talhièrs, cinemà e fòrça autras animacions... Fin finala, quina diferéncia entre una universitat d'estiu e un festenal ? "De qué servís" una universitat d'esitu ?

R.S. : Lo costat "universitat" es religat plan segur als corses de lenga e als talhièrs de traduccion, a las reflexions que menam. Nos sèm apropat de l'organizacion d'un festenal perque la lenga occitana a besonh d'illustracion. Cal mostrar que la lenga pòt èsser utilitzada per las creacions de totas menas. Après continuarèm a èsser una universitat, a mesclar los sabers, far venir d'especialistas… mas una universitat liura, dubèrta a tots.

 

LD : De qu'es l'objectiu d'aqueste "grand mescladís de gens e d'idèas" ? Que ne'n esperatz ?

R.S. : La nòstra tòca es de favorisar los encontres, entre estiles, entre las personas, entre las idèias… Mostrar tanbens los ligams que i a per exemple entre defensa de la lenga nòstra e l'agricultura responsable, los circuits corts de consomacion, la valorisacion de las creacions artisiticas localas, la decentralizacion culturala. Per nosautres tot aquò es ligat e participa d'un mema ideal de societat.

 

LD :Per acabar, perqué far un concors de burlas e racontes ?

R.S. : En primièr es per nos far plaser, viurem segurament de grands moments. Es tanben per mesclar artistas e amators, occitanistas e patejants, far venir los occitans del parçan, lor donar l'escasença de partejar çò que sabon. La tòca es de far venir le mai de monde que sabon un pauc de patoés, sens l'avèr estudiat a l'escòla e los autres, a egalitat gracias a l'oralitat. 

Lo mot de la Maira

Madama Ghislaine Martinez, es la maira de Laguépia desempuèi març 2014. Mai coneis plan la manifestacion, entre autre per i aver participat. Nos a acordat un pauc de son temps per nos respondre.

 

LD : Es important, per lo vilatge de La Guepia, d’aculhir l’Universitat Occitana d’Estiu ?

G.M. : Òc ! Es fòrça important ! Èra un pauc long d’integrar, al debuta, per una part de la poblacion. Mai èra plan explicat e uèi es acceptat del tot. I a agut de càmbiament dins l’organisacion, mai esperam de continuitat pr’aquò.

 

LD : Imagini que l’impacte sus la vida del vilatge es notable…

G.M. : I a un impacte toristic e economic plan important e per de multiplas rasons. La manifestacion atraire fòrça mond, que demoran tot la setmana, çò que vol dire una clientèla per los albèrgaments e los comèrcis. Aqueste afluéncia dinamiza tanben tot çò qu’es a l’entorn coma, per exemple los mercats. De mai, aquò al debuta de la sason touristica, quora es pas encara plan lançat. Porta de monde, de visibilitat e de far fonccionar l’economia !

 

Écrire commentaire

Commentaires : 0